Uminit ang diskusyon sa Kamara matapos batikusin ni Leila de Lima ang naging pahayag ni Leandro Leviste na umano’y may kinalaman ang mga kongresista sa vote buying.
Tinawag ni De Lima na “offensive” at “unfair” ang naturang alegasyon, at iginiit na hindi sapat na burahin lamang ito sa rekord. Aniya, nararapat na personal itong bawiin ni Leviste upang malinaw na maitama ang kanyang naging pahayag.
Nag-ugat ang isyu sa unang pahayag ni Leviste na tila nagsasangkot sa lahat ng mambabatas sa vote buying, na agad umani ng reaksiyon mula sa kanyang mga kapwa kongresista. Sa kalaunan, nilinaw niya na hindi lahat ay sangkot at binawi ang kanyang sweeping claim.
Sa kanyang paglilinaw, sinabi ni Leviste na may ilan lamang na lumalabag sa election laws at kinilala rin niya na marami sa kanyang mga kasamahan ang sumusunod sa batas.
Gayunman, kinuwestiyon pa rin ng ilang mambabatas ang batayan ng kanyang mga alegasyon, kabilang ang mga pahayag laban kay Ralph Recto at iba pang personalidad. Mariing itinanggi ng kampo ni Recto ang paratang at tinawag itong walang basehan.
Ipinagtanggol naman ni Leviste ang kanyang paninindigan, iginiit na laganap ang vote buying sa bansa at umaabot umano sa milyon o bilyong piso ang ginagastos sa kampanya. Dagdag pa niya, hindi raw siya magsisinungaling sa ganitong usapin.
Sa kasalukuyan, ini-refer na sa House Committee on Rules ang usapin upang masuri at mapagpasyahan kung ano ang nararapat na hakbang kaugnay ng kontrobersyal na mga pahayag.
