KORONADAL CITY – Naglab-ot sa masobra napulo (10) ka local government unit (LGUs) gikan sa apat ka probinsiya sa rehiyon dose ang nagpatuman sang suspension of classes sa mga pribado kag pampubliko nga buluthuan halin sang Huwebes tubtob subong nga adlaw sang Biyernes bangud sa wala untat nga pagbuhos sang ulan.
Ini ang ginkumpirmar ni Office of the Civil Defense (OCD) Region 12 Information Officer Jorie Mae Balmediano sa interview sang Bombo Radyo Koronadal.
Suno kay Balmediano ang nasambit nga mga lugar ang ginalakipan sang banwa sang Lake Sebu diri sa probinsiya sang South Cotabato; Kalamansig sa probinsiya sang Sultan Kudarat; Malapatan, Maasim kag Kiamba sa Saranggani; samtang mga banwa sang Antipas, Alamada, Pigcawayan, Carmen, Banisilan kag Aleosan sa Cotabato province.
Ang nasambit nga mga lugar ang nagpatuman sang suspension sang face to face classes apang may alternatibo nga paagi agud ga mapadayon ang leksiyon sang mga estudyante.
Magluwas sini, sa monitoring sang OCD 12 may mga lugar man nga ginbaha lakip na ang masobra napulo ka barangay sa Tulunan, Cotabato kun diin yara sa 454 pamilya ang naapektuhan.
May mga nareport man nga landslide kag mga lugar nga nangin apektado sang mabaskog nga hangin.
Sa subong, nagapadayon ang damage assessment sa nagkalain-lain nga lugar sa rehiyon labi na ang mga pamilya nga apektado.
Sa kasamtangan, ginpasiguro sang OCD-12 nga nakaalalay ang ila nga talatapan sa kada local government unit (LGU) agud nga masiguro ang madasig nga pagresponder sa kalamidad tubtob sa rapid assessment agud mahibaluan ang kabug-usan nga danyos nga ginbilin sang baha, landslide kag iban pa nga kahalitan.
Kadungan sini, panawagan sang OCD sa tanan nga maghalong, mangin vigilante kag magbantay agud nga makabakwit gilayon ilabi na nag mga nagaistar sa mga flash flood kag landslide prone areas.
