Ginhatagan pagtamod sang isa ka Ministry Coordinator halin sa Notre Dame of Marbel University (NDMU) nga ang kahulugan sang Piesta Minatay kag Kalag-kalag, ilabi na ang importansya sang pagpasidungog sa mga santos kag pagpangamuyo para sa mga nagtaliwan nga mga pinalangga sa kabuhi.
Sa interview sang Bombo Radyo Koronadal ginpahayag ni Lester Tugade, Campus Ministry Coordinator sa NDMU, nga magkatuhay ang katuyuan sang duha ka mga pag-obserbar.
Ginpabutyag ni Tugade nga ang All Saints’ Day, nga ginasaulog sa Nobyembre 1, gindedikar sa pagdumdom kag pagpasidungog sa tanan nga mga santos sa langit, lakip na ang mga wala opisyal nga ginakilala sang Simbahan.
Samtang ang All Souls’ Day nga ginasaulog sa Nobyembre 2 ang nagasentro sa pagpangamuyo para sa mga kalag sang mga nagtaliwan.
Ginpaathag pa ni Tugade nga para sa mga Katoliko, ang kamatayon wala ginakabig nga katapusan sang kabuhi, kundi isa ka pagpanglakaton padulong sa walay katapusan nga paghiusa sa Dios.
Gin-athag man sini nga ang pagpasidungog sa mga santos indi pareho sa pagsimba, bangud ang pagsimba ang gintigana lamang para sa Dios. Sa baylo, ang mga santos ginakabig subong mga modelo sang pagkabalaan kag bilang mga partisipante sa aton pangamuyo.
Gin-engganyo niya ang publiko nga indi lamang maglantaw sa mga costume kag makahaladlok nga mga simbolo sa tion sang pagsaulog, kundi unahon ang pangamuyo, pagdumdom, kag pag-apresyar sa mga kabuhi kag mga kontribusyon sang mga nagtaliwan.
Dugang niya nga sa sini nga panahon nagaserbe nga isa ka matahum nga kahigayunan para sa mga pamilya nga magtipon, paghatag sang tion upod sa isa kag isa, kag ipasa ang mga mapuslanon nga mga handumanan kag mga palanublion sang ila mga nagtaliwan nga mga pinalangga sa masunod nga henerasyon.
