Nagpasar sang resolusyon ang Sangguniang Panlalawigan sang South Cotabato para sa ginaproponer nga P3 milyon nga pinansyal nga bulig sa mga local nga hog raisers.
Sa interview sang Bombo Radyo Koronadal, ginpahayag ni Board Member Nilda Almencion, chairperson sang Committee on Agriculture sang Sangguniang Panlalawigan, nga importante ang pag-organisa sang mga hog raisers agud mas mapalig-on ang ila sektor kag mas mapahapos ang pag-angkon sang mga programa kag asistencia.
Base sa assessment sang ila komite, may anum na ka hog raisers’ associations sa Koronadal, Tampakan, Polomolok, Surallah, Tboli kag Lake Sebu, samtang may apat man ka kooperatiba sa probinsya.
Apang, wala pa sang hog raisers’ association ukon kooperatiba sa mga banwa sang Norala, Tantangan, Banga kag Tupi, nga ginakabig nga kinahanglan pa hatagan sang igtalupangod agud mapalig-on ang organisasyon sang mga nagapangabuhian sa pagpamuhi sang baboy.
Samtang, nagpatigayon na ang Committee on Agriculture sang assessment paagi sa paglibot sa mga banwa kag sa syudad sang Koronadal agud mahibaluan ang aktuwal nga kahimtangan kag mga kinahanglanon sang mga lokal nga hog raisers.
Lakip sa mga concern nga ginpahayag sang mga hog raisers halin pa sang Hulyo amo ang pagpahunong sang importasyon sang baboy, pagpatuman sang executive order (EO) para sa pagsaka sang farmgate price, kag paghatag sang livelihood programs.
Ginkilala ni Almencion ang kabudlayan kag pagkalugi nga ginaatubang sang mga hog raisers, apang ginpaathag niya nga mabudlay ipatuman ang panawagan nga magpagwa sang EO para sa pagsaka sang farmgate price bangod nagasalig man ang pungsod sa importasyon sang baboy agud masabat ang kakulang sang suplay sini sa lokal nga merkado.
Gani, gin-awhag niya ang mga local hog raisers nga magtukod sang asosasyon ukon kooperatiba agud mas mahapos makilala kag makabaton sang bulig halin sa gobyerno.
