Nagpanagtag sang bulig nga pagkaon kag tubig ang Department of Social Welfare and Development (DSWD) sa mga pumuluyo nga naapektuhan sang pag-alboroto sang Bulkang Mayon sa Albay.
Ini matapos makarekord ang bulkan sang moderately explosive eruption sang amo man nga aga, nga nagtulod sa mga lokal nga gobyerno nga magpatuman sang mandatory evacuation sa mga komunidad nga yara sa sulod sang six-kilometer Permanent Danger Zone (PDZ).
Suno sa DSWD, nakahanda ang ahensya sang 417,886 ka family food packs, 14,137 ka ready-to-eat food boxes kag 28,366 ka packs sang non-food items para sa mga pumuluyo nga nagakinahanglan sang bulig.
Gintugyan man sa SWAD Team kag Disaster Response Management Division ang pagkuha sang impormasyon kag paglista sa mga pamilya nga naglikas agud mahibaluan ang ila mga kinahanglanon.
Samtang, ginpatuman sang mga lokal nga panguluhan sang Camalig, Malilipot kag Tabaco City ang mandatory evacuation sa mga residente nga yara sa delikado nga sona, kasunod sang pagapsaka sa Alert Level 3 sa bulkan.
Ginsuspinde man ang klase sa mga apektado nga lugar bilang paghalong sa seguridad sang mga estudyante kag mga pumuluyo samtang padayon nga ginabantayan ang aktibidad sang Bulkang Mayon.
