Yara na sa kustodiya sang mga otoridad ang isa ka vendor matapos nga madakpan sa checkpoint kag makuhaan sang illegal nga droga sa Barangay Inug-ug, Pikit Cotabato.
Ginkilala ni Police Lieutenant Colonel Romeo Calamba, Officer-In-Charge sang Pikit Municipal Police Station, ang suspek nga alyas “Ras”, 26 anyos, soltero kag isa ka street vendor nga residente sang Brgy. Fort Pikit, Pikit SGA BARMM.
Suno kay PLtCol. Calamba, sang magpatigayon sang checkpoint operation ang Pikit MPS, ginpauntat nila ang ginasakyan nga motorsiklo sang suspek apang hinali nga nagpadasig ini sa pagpadalagan sa baylo nga magpundo.
Gilayon naman nga nabalabagan kag ginpaidalom sa body search kun diin nakumpiska gikan sa suspek ang isa ka dyutay nga plastic sachet sang ginapatihan nga shabu nga may kabug-aton nga 0.09 gramo nga nagakantidad sang Php600.00.
Magapangatubang naman ang suspek sa kaso nga paglapas sa Art. 151 sang Revised Penal Code kag kaso nga may kaangtanan sa illegal nga droga.
