KORONADAL CITY– Natumod na sang kapulisan ang pila ka mga persons of interest sa pagpatay sa isa ka manugtinapay sa Barangay Poblacion, Tantangan, South Cotabato.
Ini ang ginkumpirmar ni Police Major Randy Apostol, OIC Chief of Police sang Tantangan PNP sa interview sang Bombo Radyo.
Apang, nagpamalibad anay si Apostol nga ibuyagyag ang identity sang mga ini bangud ginalauman nga sa madason nga semana pasakaan na sang kaso nga pagpatay ang mga suspek.
Madumduman nga ginluthang-patay ang biktima nga si Brene Baladjay nga residente sang New Lambunao samtang nagapauli ini.
Isa sa mga anggulo nga ginalantaw sa karon ang suno pa utang nga wala nabayaran sang biktima.
May posibilidad man nga nasal-an lamang ang biktima nga asset sang mga pulis ukon mistaken identity.
Una diri, dako ang pagpati sang pamilya sang biktima nga wala sang sala ang napatay bangud wala ini sang kontra ukon indi man involbado sa anuman nga krimen.
Sa karon, nagapangayo sang bulig ang pamilya para sa pagpalubong sa bangkay sini.
Nahibaluan nga bread winner ang napatay nga biktima kag ang pagbaligya sang tinapay ang palangabuhian sini.
