Ginpamatukan sang United Nations (UN) International Maritime Organization (IMO) ang ano man nga pagpanukot sang bayad sa mga barko nga nagalabay sa mga nagapanguna nga maritime waterway.
Ini matapos nga gin-anunsyo ni US President Donald Trump ang iya intensyon nga ipatuman ang naval blockade sa Iran kag magpanukot sang 20% nga balayran sa tanan nga cargo nga nagaagi sa Strait of Hormuz.
Sa isa ka post sa Truth Social, ginpahayag ni Trump nga magasugod gilayon ang proseso, sa pihak nga wala sia naghatag sang dugang nga detalye sa sini nga bagay.
Suno naman sa tagpamaba sang IMO nga padayon nila nga ginabantayan ang sitwasyon kag nagahulat sang mas maathag nga impormasyon, samtang gina-athag ang ila madugay na nga panindugan batok sa pagpatuman sang mga balayran sa pag-agi sa mga strait nga ginagamit para sa internasyonal nga nabigasyon.
Dugang pa sang ahensya, wala sang legal nga basehan ang pagpatuman sang mandatory tolls agud lamang makaagi sa isa ka strait.
Samtang, nagakabalaka naman ang pila ka mga opisyal sang shipping industry sa nasambit nga lihok sang US nga suno sa ila maathag nga paglapas sa international law.
