Nagatinguha ang lokal nga panguluhan sang Koronadal City nga makakita sang win-win solution sa mga isyu sa transportasyon nga makahatag sang patas nga konsiderasyon sa interes sang mga tricycle drivers kag pasahero.
Sa interview sang Bombo Radyo Koronadal, ginpahayag ni Mayor Erlinda “Bing” Araquil nga kinahanglan pa nga maathag ang mga patakaran nahanungod sa pagbiyahe sang mga tricycle sa boundary sang Koronadal City kag Banwa sang Tantangan.
Suno sa alkalde, dapat mahibaluan kon diin lamang puwede makabiyahe ang mga tricycle halin sa Tantangan pakadto sa Koronadal kag ang mga tricycle sang Koronadal pakadto sa Tantangan, ilabi na nga may yara man sang kaugalingon nga polisiya ang LGU Tantangan nga nagadumili sa mga tricycle halin sa Koronadal nga magbyahe sa ila lugar.
Samtang, ginakilala man sang city government ang mga epekto sang pagbag-o sa sistema sang pagpamasahero.
Apesar may pila na ka lugar nga naka-adjust na, may mga drivers gihapon nga nagapahayag sang reklamo bangud sa pagnubo sang ila pasahero.
Ginbaliwala man ni Mayor Araquil ang mga alegasyon nga kontra sa imol ang iya administrasyon, kag ginpahayag nga bilang alkalde, responsibilidad niya nga talupangdon ang kabug-osan nga kaayuhan sang pumuluyo apesar pa nga naghalin siya mismo sa kabudlayan.
