Nag-umpisa na ang midterm elections sa Estados Unidos, kun sa diin nagaboto ang mga Amerikano agud magpili sang mga bag-o nga representante sa House of Representatives kag Senado.
Importante ang sini nga eleksyon bangud mahimo sini mabag-o ang balanse sang gahum sa Kongreso, nga sa subong kontrolado sang Republican Party, ang partido ni Presidente Donald Trump.
Ang resulta sang eleksyon may dako nga epekto sa pagpatuman sang mga polisiya kag programa sang administrasyon ni Trump sa nabilin nga duha ka tuig sang iya termino.
Pagabotoan ang tanan nga 435 ka puwesto sa House of Representatives. Lakip sa mga ginabantayan ang 18 ka distrito nga ginakabig nga hugot ang piniliay, diin 14 ang kasamtangan nga ginakontrol sang Republicans kag apat naman ang yara sa Democrats.
Nagbukas ang mga presinto sa nagkalain-lain nga estado, lakip ang Florida, Delaware, Georgia, Illinois, Louisiana, Maryland, Massachusetts, Michigan, Missouri, Pennsylvania kag South Carolina, subong man sa Washington, D.C.
Mas temprano naman nga nag-umpisa ang botohan sa pila ka bahin sang Maine kag Ohio, nga ginakabig nga importante nga swing states.
Antes pa ang opisyal nga adlaw sang eleksyon, naglab-ot na sa kapin 58.6 milyon ka Amerikano ang nakahatag sang ila boto paagi sa early voting kag mail-in ballots.
Ginapaabot karon ang resulta sang eleksyon bangud mahimo sini mabag-o ang balanse sang gahom sa Kongreso kag makaapekto sa direksyon sang administrasyon ni Trump.
