Patay ang pito ka tawo kag masobra 100 ang napilasan matapos magbungguanay ang duha ka tren sa Al-Ayyat, malapit sa siyudad sang Giza sa Egypt.
Suno sa railway authority sang pungsod, nagabiyahe pakadto sa southern Egypt ang duha ka tren sang nagbungguanay ang isa sa likod nga bahin sang isa pa ka tren nga nagahulat sa riles.
Bangud sini, madamo nga karwahe ang naghalintang kag naghulog sa embankment. Gilayon nga nagresponde ang mga rescue team kag emergency personnel agud luwason ang mga pasahero nga naipit sa nagbaliskad nga mga karwahe.
Lakip sa mga napatay ang driver sang isa sa mga tren. Suno sa Health Minister nga si Dr. Khaled Abdel Ghaffar, ang mga nasamaran ginabulong bangud sa nabali nga mga tul-an kag pilas sa ulo.
Ginpaandam man sang public prosecutor nga posible pa nga magdugang ang kadamuon sang mga napatay. Nagmando naman si Egyptian President Abdul Fattah al-Sisi sang imbestigasyon agud mahibaluan ang rason sang aksidente kag mapanabat ang bisan sin-o nga mapamatud-an nga nagpabaya.
Samtang, temporaryo nga ginpasuspenso ang biyahe sang mga tren sa tunga sang Giza kag Upper Egypt samtang ginakuha ang naguba nga mga karwahe. Dugang sa kabug-at sang trahedya, natabo ang insidente malapit sa lugar sang isa man ka makahaladlok nga train disaster sang 2002, nga nagbilin sang sobra 370 ka patay.
