Gintakop sang Switzerland ang ila 88 ka tuig nga paghulat para makabaton sang isa ka kadalag-an sa knockout stage sang FIFA World Cup.
Napierde sang Switzerland ang Algeria, 2-0, sa katapusan nga hampang sang Round of 32 nga ginhiwat sa Vancouver, Canada.
Sa ika-10 ka minuto, nakuha nila ang 1-0 nga abanse matapos mapasulod ni Breel Embolo ang isa ka madasig nga short-range shot sa bulig sang assist halin kay Johan Manzambi.
Nagtinguha man nga makabawi ang Algeria sa katapusan sang first half, apang sa baylo nga makaiskor, mas lalo pa sila nalubong pag-abot sang second half.
Sa ika-46 ka minuto, ginsamantala ni Swiss defender Dan Ndoye ang maluya nga depensa sang Algeria kag napasulod ang ikaduha nga goal sang Switzerland halin sa tunga sang penalty box, nga nagpasaka sang ila abanse sa 2-0.
Wala na nakapangita sang paagi ang Algeria agud makabawi tubtob nagtapos ang hampang, bisan pa sa dugang nga oras ukon stoppage time.
Bangud sini, opisyal nang nakasulod ang Switzerland sa Round of 16, kun sa diin magapabilin sila sa Vancouver agod atubangon ang magamadaug sa duwa sa tunga sang Colombia kag Ghana sa masunod nga Hulyo 7.
