Naglab-ot sa masobra P194.6 million ang kabug-usan nga balor sang kontrabando nga sigarilyo kag watercraft nga nakumpiskar sang Naval Command Western Mindanao (NCWM) sa duha ka separado nga anti-smuggling operations sa kadagatan sang Sulu.
Sa pinakaulihi nga operasyon sadtong Agosto 14, gin-intercept sang mga tinawo sang Naval Task Force 61 ang isa ka watercraft nga kargado sang undocumented foreign cigarettes sa kadagatan malapit sa Buton Mahablo, Parang, Jolo, Sulu.
Ginabulubanta P170 million ang balor sang nakumpiskar nga mga sigarilyo, samtang ginabulubanta naman nga nagabalor sang P1.5 million ang watercraft. Arestado man ang lima ka mga crew members kag 19 ka mga laborers nga ginaalegar sakay ukon involved sa operasyon.
Ang mga nakumpiskar nga kontrabando kag watercraft ang ginturn-over sa Bureau of Customs–Port of Zamboanga para sa nagakaigo nga disposisyon kag legal nga pagproseso.
Samtang sang Hulyo 29, nakumpiskar man sang NCWM ang mga kontrabando nga sigarilyo kag isa ka motorized banca sa kadagatan malapit sa Simisa Island, Sulu nga may gintingob nga balor nga P23 milyones.
Suno sa NCWM, padayunon sini ang pagpabaskog sang maritime patrols kag koordinasyon sa nagkalain-lain nga law enforcement agencies agud mapunggan ang paggamit sang kadagatan sang Western Mindanao bilang alagyan sang kontrabando kag iban pa nga ilegal nga aktibidad.
