Ginhatagan sang Oslo District Court si Marius Borg Høiby, stepson ni Crown Prince Haakon sang Norway, sang apat ka tuig nga pagkapriso matapos mapamatud-an nga may sala sa kaso sang rape, domestic violence kag iban pa nga krimen.
Sa desisyon nga ginpaguwa sang Lunes pagkatapos sang pito ka semana nga trial, napamatud-an nga guilty si Høiby sa 34 sa 40 ka kaso nga ginpasaka batok sa iya.
Lakip diri ang duha ka kaso sang rape kag pila ka insidente sang pagpang-abusar sa iya anay nga kahagugma.
Isa sa mga kaso sang rape ang gin-alegar nga nagluntad sa basement sang puluy-an sang Crown Prince.
Suno sa korte, indi makasabat ukon makakontra ang isa sa mga biktima bangud sang iya kahimtangan sang natabo ang insidente.
Guilty man si Høiby sa pag-angkon kag pagpanagtag sang iligal nga droga, paglapas sa restraining orders kag iban pa nga kaso.
Apang, gin-abswelto siya sa duha ka iban pa nga kaso sang rape.
Sa tion sang trial, ginpresentar ang mga ebidensya kasubong sang electronic messages, video recordings kag mga testimonya nga nagaangot sa iya sa pagusar sang droga kag mapintas nga pamatasan.
Nagpahayag man ang kampo ni Høiby nga ila i-apelar ang desisyon sang korte.
Suno sa prosekusyon, ang kaso nagapakita nga wala sang bisan sin-o, bisan ano pa ang iya kahimtangan sa kabuhi, nga makalikaw sa pagpatuman sang kasuguan.
Wala na sang dugang nga pahayag ang Norwegian royal household kag nagsiling nga yara na sa kamot sang korte ang kaso.
Samtang, wala sang opisyal nga titulo ukon katungdanan sa royal family si Høiby, apang ang kaso nagdala sang daku nga kontrobersiya sa Norway kag nakaapekto sa imahe sang royal family.
