Ginpasalamatan ni Koronadal City Mayor Erlinda “Bing” Araquil ang provincial government sang South Cotabato sa paghatag sang P50 milyon nga pondo para sa first phase sang ginapaabot nga city infirmary hospital.
Suno kay Araquil, P45 milyon ang igahin sa konstruksyon sang building, samtang P5 milyon ang para sa mga kinahanglanon nga pasilidad sa sulod sang ospital.
Ginpaabot nga magalawig sang isa ka tuig kag tatlo ka bulan ang konstruksyon sang proyekto, nga na-award na sa napilian nga kontraktor.
Dugang pa sang alkalde, dako ini nga bulig sa mga pumuluyo, ilabi na sa mga kabudlay nga pamilya nga nagakinahanglan sang serbisyo medikal kag wala sang ikasarang sa pribado nga mga ospital.
Suno sa alkalde, importante ang proyekto sa pagpalapad sang serbisyo panglawas sa syudad, ilabi na bangod madamo nga pasyente ang nagasalig sa South Cotabato Provincial Hospital, nga mahimo mag-atubang sang kakulang sa kapasidad sa pag-atipan sa tanan nga nagakinahanglan sang pagbulong.
Ginkilala man ni Araquil ang commitment sang provincial government sa paghatag sang dugang nga pasilidad medikal, nga kabahin sang dugay na nga handum sang syudad nga mas mapalapit ang serbisyo panglawas sa mga pumuluyo.
