KORONADAL CITY – Nagbiya na sa General Santos City sang Hulyo 6 ang mga atleta nga maga-representar sa Soccsksargen Region sa Palarong Pambansa 2024 sa Cebu City nga ipatigayon tubtob sa Hulyo 17 sini nga tuig.
Ini ang ginpahayag ni Magdaleno “Jojo” Duhilag, Regional Sports Coordinator sa interview sang Bombo Radyo Koronadal.
Suno kay Duhilag, preparado na ang tanan para sa Soccsksargen Warriors bangud una na nga nagbisita ang advance party sang Department of Education sa Cebu City agud nga checkyaron ang ila nga billiting school.
Gina-ekspektar naman nga magluwas sa mga medalya nga makuha sang mga atleta gikan sa nagkalainlain nga hinampang, makakuha man sang special awards ang rehiyon.
Una na nga ginpasiguro ni Duhilag nga humalin nga natapos ang Soccsksargen Regional Athletic Association Meet (SRAA) nagpaidalom na gilayon sa rigid training ang mga athletes.
Sa sini nga tuig, target sang Soccsksargen warriors nga malabawan pa ang mga medalya nga nakuha sang nagligad nga Palarong Pambansa.
