KORONADAL CITY – Nagatuman na ang madamo nga mga miyembro sang kontrobersiyal nga Shincheonji religious organization sa Daegu City nga suno pa ugat sa paglapta sang coronavirus sa pungsod South Korea.
Ini ang ginpahayag ni Girlie Simpao Yoon nga isa ka residente sa nasambit nga pungsod sa interbyu sang Bombo Radyo Koronadal.
Suno kay Yoon, ini makaligad ginhatagan sang ultimatum sang South Korean government ang mga miyembro sang nasambit nga religious cult nga mahimo sila nga mapreso sang isa ka tuig kag pagabaydon sang 10 million won kun indi magpakig-angot sa mga otoridad agud matapna ang outbreak.
Samtang patong-patong nga kaso man ang ginapangatubang sang ila founder nga si Lee Man Hee kun sa diin padayon na ini nga ginaimbestigaran sang mga otoridad.
Madumdoman nga nakaangkon sang pagpakamalaut ang nasambit nga church founder bangud sa indi suno pa sini tampad nga pagpangayo sang pasaylo bangud sa paglapta sang virus.
Samtang ginpahayag ni Yoon nga pila sa mga miyembro sang Shincheonji ang nagpatigayon sang isa ka petisyon nga pahalinon si President Moon Jae In nga responsable suno pa sa pagpasulod sang mga tawo halin sa Wuhan City, China antes naglapta ang balatian.
Sa pihak nga bahin, hugot man sini nga ginpanginwala ang mga impormasyon nga ginasunog na suno pa ang mga bangko kag ang mga kwarta bilang ginaaligar nga paagi agud indi na maglapta pa ang virus.
