Ginaprubahan sang Senate panel sang Lunes ang mga hagna agus iposponer ang Barangay kag Sangguniang Kabataan Elections (BSKE) sa 2026 kag himuon nga lima ka tuig ang termino sang mga barangay kag SK officials.
Suno kay Senator Francis “Chiz” Escudero, tuyo sang sini nga hagna nga patas nga maayos ang termino sang mga barangay kag SK officials agud indi na ini masami ginabag-o ukon ginagamit nga rason sa pagposponer sang eleksyon.
Sa idalom sang Senate Bill No. 2387, ginapanugyan ni Escudero nga amyendahan ang Republic Act No. 12232 kag himuon nga lima ka tuig halin sa apat ka tuig ang termino sang mga barangay kag SK officials.
Samtang, nagpasaka man si Senator Imee Marcos sang Senate Bill No. 2067 nga tinutuyo nga ibalhin ang BSKE halin Nobyembre 2026 pakadto Oktubre 2027.
Samtang, nagpanawagan si Commission on Elections (Comelec) Chairperson George Garcia nga dapat may klaro na nga desisyon sa madali nga tion kon matigayon ukon ma-postpone ang BSKE.
Suno kay Garcia, dapat mahibaluan ang desisyon antes matapos ang Setyembre bangud nakatalana ang filing sang certificates of candidacy halin Setyembre 28 tubtob Oktubre 5.
Gindugang niya nga mas maayo kun maathag na ang sitwasyon pagsulod sang ikaduha nga semana sang Setyembre agud makapreparar ang mga kandidato kag field personnel sang Comelec.
