Ginpahayag ni Senate President Sherwin Gatchalian nga magasunod ang Senado sa desisyon sang Korte Suprema nga nagdeklarar nga supak sa Konstitusyon ang pila ka probisyon sang national budget, samtang ginapahayag pa ang epekto sini sa 2026 General Appropriations Act (GAA).
Suno kay Gatchalian, indi ang bug-os nga 2026 budget ang gin-deklarar nga unconstitutional, kundi duha lamang ka probisyon nga nagatugot sa pagpagwa sang unprogrammed appropriations base sa sobra nga koleksyon halin sa pila ka non-tax revenue sources kag sa bag-o nga mga ginahalinan sang kita.
Sa desisyon sang Korte Suprema, gin-athag nga indi awtomatiko nga supak sa Konstitusyon ang unprogrammed appropriations, apang kinahanglan nga klaro ang mga kondisyon sa pagpagwa sang pondo kag nagasunod ini sa mga limitasyon nga ginapatuman sang Konstitusyon.
Gin-deklarar man sang Korte Suprema nga unconstitutional ang pagdugang sang Kongreso sang ₱449.5 bilyon sa unprogrammed appropriations sang 2024 budget, nga halin sa ₱281.9 bilyon nga ginpanukot sang Presidente sa National Expenditure Program (NEP) nagdangat sa ₱731.4 bilyon sa naaprubahan nga budget.
Samtang, sa 2025 budget, ginpawalay-bisa man ang pagdugang sang ₱17.99 bilyon sa pondo sang Department of Public Works and Highways (DPWH) Special Road Fund.
Sa pihak nga bahin, nagpangayo ang mga senador sang pagpaathag sa Department of Budget and Management (DBM) kon paano ipahiuyon sa desisyon sang Korte Suprema ang mga probisyon sa ginapanukot nga national budget para sa 2027.
Ginpahayag naman ni Budget Secretary Kim Robert de Leon nga makig-angot ang DBM sa Kongreso agud mahibaluan ang mga kinahanglanon nga tikang kag masiguro nga ang pag-alokar kag pagpagwa sang pondo sang publiko nagasunod sa Konstitusyon.
