Gindeklarar sang Korte Suprema nga supak sa Konstitusyon ang bug-os nga 2024 national budget, matapos makita nga ginpasobrahan sang Kongreso ang pondo para sa unprogrammed appropriations nga naglab-ot sa P449.5 bilyon, nga naglapaw sa orihinal nga ginrekomendar nga badyet sang Presidente.
Sa 121-page nga desisyon nga ginsulat ni Senior Associate Justice Marvic Leonen, ginpahayag sang Korte nga indi puwede dugangan sang Kongreso ang kabug-usan nga appropriation nga ginrekomendar sang Presidente sa National Expenditure Program (NEP).
Halin sa P281.9 bilyon nga unprogrammed appropriations sa NEP, gindugangan ini sang Kongreso tubtob sa P731.4 bilyon sa General Appropriations Act (GAA), ukon ang opisyal nga ginpatuman nga national budget para sa 2024.
Ginpahayag man sang Korte nga indi awtomatiko nga supak sa Konstitusyon ang unprogrammed appropriations, apang kinahanglan ini nga sakop sang hugot nga mga safeguard agud malikawan ang pag-abuso sa pondo sang gobyerno. Lakip man sa desisyon ang mga probisyon sang 2025 kag 2026 national budgets nga nakita nga nagalapas sa mga limitasyon sang Konstitusyon sa paggasto sang gobyerno.
Madumduman nga ang NEP amo ang ginahanda nga panukala sang national budget sang ehekutibo, nga ginatipon sang Department of Budget and Management (DBM) kag gin-aprubahan sang Presidente kag Gabinete antes ipasa sa Kongreso para sa pag-usisa kag pag-apruba. Samtang, ang GAA amo ang opisyal nga badyet nga ginpasa bilang layi.
