Nagapanawagan ang Makabayan bloc sa House of Representatives nga bawi-on kag rebisahon ang bersyon sini sang panukalang 2027 national budget bangod may yara pa umanoy mga probisyon nga kaangay sang mga gin-deklarar nga unconstitutional sang Korte Suprema sa nagligad nga mga budget law.
Lakip sa ginakuwestiyon sang grupo ang P50 bilyon nga pondo para sa AFP modernization, daku nga lump-sum allocations para sa mga lokal nga panggobyernohan, kag ang pagbalhin sang pondo sa unprogrammed appropriations.
Ginpahayag man sang Makabayan bloc nga nadugangan sang sobra sa 6,000 ka bag-o nga public works projects ang panukala paagi sa ginatawag nga institutional amendments, nga wala ginlatag sing tagsa-tagsa ang mga proyekto.
Suno kay Kabataan Representative Renee Co, nagapabilin ang peligro sang korapsyon sa nagkalain-lain nga infrastructure projects, lakip ang multipurpose buildings, farm-to-market roads kag mga classroom.
Samtang, ginpangabay sang Gabriela Party-list nga imbestigahan ang National Farm-to-Market Roads Network Plan kasunod sang mga alegasyon parte sa mga ghost project kag overpricing.
Nagapanawagan man ang Makabayan bloc sa Office of the Ombudsman kag Commission on Audit nga usisaon ang mga opisyal nga posible may responsibilidad sa mga probisyon nga nagalapas sa Konstitusyon.
Apang, ginpanginwala sang Malacañang ang interpretasyon sang Makabayan bloc nga mahimo manabat ang Presidente, kag ginpahayag nga wala ini ginadeklarar sa desisyon sang Korte Suprema.
