Magapasaka ang administrasyon ni Presidente Ferdinand Marcos Jr. sang motion for reconsideration sa Korte Suprema agud iparepaso ang desisyon sini nga nagdeklarar nga unconstitutional ang pila ka probisyon sang 2024, 2025 kag 2026 national budgets.
Sa press briefing sang Miyerkules, Oktubre 21, ginpahayag ni Palace Press Officer Undersecretary Claire Castro nga ginmanduan na ang Office of the Solicitor General (OSG) nga magpasaka sang nasambit nga motion bangud indi nagauyon ang administrasyon sa pila ka bahin sang desisyon sang mataas nga korte.
Suno kay Castro, nagapati ang administrasyon nga wala ini naglapas sa bisan ano nga kasuguan ukon probisyon sang Konstitusyon kag nagsunod lamang sa mga proseso nga ginapatuman sang kasuguan sa paggamit sang pondo sang gobyerno.
Ginkwestyon man sang Malacañang ang kondisyon sang Korte Suprema nga kinahanglan malab-ot anay sang kabug-usan nga koleksyon sang gobyerno ang revenue target antes magamit ang unprogrammed appropriations ukon mga pondo nga ginatugutan lamang nga magamit kon matuman ang pila ka kondisyon.
Sa desisyon sang Korte Suprema, gin-deklarar nga unconstitutional ang 2024 national budget bangud sa dugang nga ₱449.5 bilyon nga unprogrammed appropriations, samtang ginbasura man ang dugang nga ₱17.99 bilyon sa Special Road Fund sang Department of Public Works and Highways (DPWH) sa 2025 budget. Gin-deklarar man nga unconstitutional ang pila ka probisyon parte sa paggamit sang unprogrammed appropriations sa 2026 budget.
Apang, ginpaathag sang Korte Suprema nga ang unprogrammed appropriations indi awtomatiko nga unconstitutional, basta may klaro nga mga limitasyon kag safeguards agud masiguro ang transparency, accountability kag disiplina sa pagdumala sang pondo sang publiko.
Paagi sa motion for reconsideration, ginapangabay sang administrasyon nga repasuhon liwat sang Korte Suprema ang nasambit nga desisyon.
