Wala nauyonan ang pila ka hog raisers sa suhestyon sang gobyerno nga mag-untat na lamang sa pagbuhi sang baboy bangud sa naganubo nga presyo sang buhi nga baboy sa merkado.
Sa interview sang Bombo Radyo Koronadal kay Arnel Baroso, presidente sang Titans Hog Raiser Association, iya ginpabutyag ang pagkadismaya sang mga hog raisers sa nasambit nga suhestyon, nga suno sa ila, indi amo ang solusyon sa problema nga ila ginapangatubang sa kasamtangan.
Suno kay Baroso, indi nila mabaton ang panawagan nga untatan na lamang ang hog raising bangud madugay na nga negosyo sang ila mga pamilya ang pagbuhi sang baboy. Dugang pa, indi lamang ini pangabuhian kundi isa man ka negosyo nga ila ginpatindog kag ginpadayon sa sulod sang madamo nga katuigan.
Kaangot sini, ginkwestyon man ni Baroso ang indi pagpatuman sang executive order sang gobyerno nga may kaangtanan sa pagpasaka sang floor price sang buhi nga baboy, subong man ang panawagan nga untatan ang importasyon sang baboy sa Region 12.
Suno sa iya, kinahanglan nga may yara sang klaro kag epektibo nga tikang ang gobyerno agud mabuligan ang mga lokal nga hog raisers nga makaangkon sang insakto nga balor para sa ila mga hinuptan kag malikawan ang padayon nga kaperdihan sang ila negosyo.
Ginkilala man ni Baroso ang mga bulig kag ayuda nga ginahatag sang gobyerno sa mga hog raisers sa kasamtangan. Apang ginpahayag niya nga indi lamang pinansyal nga bulig ang ila kinahanglan, kundi mas labaw nga importante ang konkreto kag malawig nga solusyon nga makasabat sa problema sa naganubo nga presyo sang buhi nga baboy.
Gani, ginapanawagan sang mga hog raisers nga hatagan sang seryoso nga pagtalupangod sang gobyerno ang ila mga kabudlayan kag magpatuman sang mga tikang nga makapanalipod sa lokal nga industriya sang pagpanguma sang baboy.
Para sa mga hog raisers, ang pag-untat sa ila negosyo indi ang nagakaigo nga sabat sa krisis, bangud ang ila ginapangita amo ang patas nga presyo, suporta sa ila pangabuhian kag mga polisiya nga makabulig sa pagpadayon sang ila industriya.
