Ginapabakod sang Philippine National Police (PNP) sa South Cotabato kag Rehiyon 12 ang ila preparasyon para masiguro ang matawhay kag hapsay nga pagsaulog sang Undas 2026.
Sa interview sang Bombo Radyo Koronadal kay Police Lt. Col. Peter Pinalgan Jr., Deputy Provincial Director for Operations sang South Cotabato PNP, ginpahayag sini nga nagpatigayon ang Regional Headquarters sang coordinating meeting upod sa mga opisyal sang kapulisan agud talakayon ang nagakaigo nga mga panuytoy kag preparasyon para sa palaabuton nga Undas.
Suno kay Pinalgan, lakip sa ila ginhisgutan ang mga safety plan kag aktibidad nga ipatuman antes kag sa tion sang pagdumdom sa mga napatay, ilabi na sa mga sementeryo kag sa mga lugar nga madamo ang bisita.
Ginpahayag man sini nga himuon nga leksyon sang kapulisan ang mga eksperyensya sa pagsaulog sang Undas sang nagligad nga tuig agud mapauswag pa ang ila serbisyo kag mas mapabakod ang seguridad sa sulod kag sa guwa sang mga sementeryo.
Ginpangapinan man ni Pinalgan ang publiko nga preparado na ang PNP sa Rehiyon 12 kag may yara na sang natalana nga mga security plan kag aktibidad agud malikawan ang kagamo kag iban pa nga insidente, kag masiguro ang malinong nga pagbisita sang publiko sa ila mga pinalangga nga napatay na.
