Ginpaandaman ni Prof. Renato De Castro, eksperto sa international relations kag foreign policy, ang gobyerno sang Pilipinas nga indi balewalaon ang bag-o nga pahayag sang Chinese Embassy may kaangtanan sa nagapadayon nga tensyon sa West Philippine Sea.
Madumduman nga sang Huwebes, Oktubre 15, ginpahayag sang Chinese Embassy nga madali sila magdaog kun magdesisyon nga maggamit sang puwersa, apang ginpili nila nga likawan ini bangud ginapabugal nila ang pagpalangga sa kalinong.
Suno kay De Castro sa interview sa Bombo Radyo, nagapakita ini sang ginatawag nga “wolf warrior diplomacy,” nga nagagamit sang direkta kag mabaskog nga mga pahayag sa baylo nga ang kalmado kag pormal nga pamaagi sang tradisyonal nga diplomasya.
Dugang niya, nagahalin ini sa pagpati sang China nga mas makusog ang ila pwersa sa rehiyon, lakip ang ila dako nga hukbong-dagat.
Gin-athag man ni De Castro nga bisan ginapakita sang China ang Pilipinas bilang nagahimo sang problema sa rehiyon, kinamatarong sang Pilipinas nga depensahan ang iya teritoryo batok sa pagpanghilabot.
Bangud sini, ginpahayag sang eksperto ang pagpalig-on sang paghiusa sang mga Pilipino, pagpakita sang katatagan, kag pagpalig-on sang Armed Forces of the Philippines (AFP) agud maproteheran ang soberanya sang pungsod.
