Ginsabat ni Sen. Alan Peter Cayetano ang mga alegasyon nga kuno P700 milyon ang nauyang nga pondo sang Senado sang siya ang nangin Senate President.
Madumduman nga una nga ginpahayag ni Sen. Panfilo “Ping” Lacson nga nakaabot kuno sa amo nga kadaku nga kantidad ang ginasto ukon nauyang nga pondo sa sulod lang sa 28 ka adlaw nga pagpungko ni Cayetano bilang lider sang Senado.
Matigdas nga ginpanginwala ni Cayetano ang amo nga alegasyon kag gintawag niya nga “intellectual dishonesty” ang pagsuma nga ginbasehan sa pagsiling nga P700 milyon ang nadula sa iya halos isa ka bulan nga termino.
Suno kay Cayetano, ang kantidad nga ginatawag nga halos P25 milyon kada adlaw nakuha lang paagi sa pagbahin sang kabug-usan nga tinuig nga budget sang Senado sa kadamuon sang adlaw sa isa ka tuig.
Ginpaathag niya nga ini nga gastuson kabahin sang regular nga operasyon sang Senado kag indi nakadepende kun sin-o ang nagapungko bilang Senate President.
Ginpahayag ni Cayetano nga wala sang basehan ang pagsiling nga nauyang ang pondo bangud ang mga gastuson kabahin lamang sang padayon nga pagpadalagan sang institusyon.
