Naglatag ang Department of Agriculture (DA) sang P61.99 bilyon nga plano agud maprotektahan ang produksyon sang pagkaon kag pangabuhian sang mga mangunguma kag manugpangisda batok sa posible nga epekto sang El Niño sa 2026.
Sa hearing sang House Committee on Agriculture and Food, ginkumpirmar ni DA Assistant Secretary U-Nichols Manalo nga may yara sang pondo sa idalom sang 2026 General Appropriations Act nga magasuporta sa mga programa para sa preparasyon kag pag-atubang sa epekto sang El Niño.
Lakip sa plano ang P6.2 bilyon nga nauna na nga ginpagwa sa idalom sang UPLIFT program, samtang ang pinakadako nga bahin nga nagabalor P35 bilyon igatugyan para sa mga binhi, abono kag iban pa nga kinahanglanon sa pagpanguma.
Kabahin man sang mga tikang ang rehabilitasyon sang mga pasilidad sang irigasyon, pagbutang sang solar-powered irrigation systems, pagtukod sang dyutay nga water impounding facilities kag pagpatuman sang cloud seeding sa mga lugar nga kulang sa suplay sang tubig.
May yara man sang pondo para sa pag-atipan sang mga kasapatan, poultry kag palaisdaan, pati crop insurance kag mga loan program agud mabuligan nga mapanubo ang posible nga kaperdihan sang mga mangunguma kag manugpangisda.
Samtang, nagalakip ang UPLIFT program sang ginabulubanta P3 bilyon nga fuel assistance para sa mga mangunguma, manugpangisda kag truckers.
Nagapangayo man ang DA sang dugang nga P371 milyon para sa cloud seeding operations kag pagkontrol sa mga peste nga nagahalit sa mga talamnan sang tubo.
Dugang pa diri, ginaproponer ang P10 bilyon nga pondo para sa bulig sa mga mangunguma kag manugpangisda sa 2027.
Padayon man nga palig-onon sang ahensya ang monitoring sa presyo sang mga balaklon, transportasyon kag Kadiwa program agud masiguro ang bastante kag masarangan nga presyo sang suplay sang pagkaon.
