May yara na sang grupo nga nagabulig kay former South Cotabato 2nd District Representative Dr. Peter Miguel sa pag-ila kag pagsubay sa mga indibidwal nga nagapalapta sang ginapaalegar nga fake news batok sa iya sa social media.
Sa interview sang Bombo Radyo Koronadal, ginpahayag ni Miguel nga may mga tikang na sila nga ginapatigayon agud matukiban ang mga tawo sa likod sang mga social media account nga nagasugod kag nagapalapta sang indi matuod nga impormasyon parte sa iya.
Suno kay Miguel, natukiban na sang iya grupo nga ang pila sa mga account nga nagapost sang amo nga impormasyon mga troll account lamang kag gintago na halin sa umpisa ang matuod nga identidad sang mga tawo sa likod sini.
Apang, ginpaathag niya nga indi mahapos mahibaluan ang matuod nga identidad sang mga tag-iya sini bangud indi lamang ang ila pangalan kag address ang kinahanglan matukiban kundi pati ang Internet Protocol ukon IP address nga nagagamit sang nasambit nga mga account.
Sa pihak sini, ginpahayag ni Miguel nga yara pa sa idalom sang cyber investigation ang kaso kag kinahanglan ang pagbulig sang Cybercrime Laboratory sang mga awtoridad agud makakuha sang nagakaigo nga ebidensya kag resulta sa pag-imbestigar.
Gani, padayon ang ila pagpaninguha nga matukiban ang mga responsable sa pagpalapta sang ginapaalegar nga fake news kag mapanabat sila sa nagakaigo nga proseso sang layi.
