Gin-aprubahan sang Sandiganbayan Second Division ang pag-withdraw ni Senador Jinggoy Estrada sa iya mosyon nga nagapangayo sang temporaryo nga paggwa sa prisuhan agud makatambong sa impeachment trial ni Vice President Sara Duterte.
Bangud sini, ginbawi na sang korte ang mando nga nagapangayo sang komento halin sa prosekusyon, kag gin-deklarar ini nga moot and academic.
Suno sa kampo ni Estrada, nagluntad ang sala bangud ang mosyon napasa sa Second Division sa baylo sa Fifth Division sang Sandiganbayan, nga amo ang may hurisdiksyon sa iya ginadestino nga prisuhan bangud sa iya non-bailable nga kaso nga plunder may kaangtanan sa gin-alegar nga anomalya sa flood control projects.
Bisan nakapagpiyansa si Estrada sang ₱90,000 para sa separado nga graft case sa idalom sang Second Division, nagapabilin siya nga detinado sa New Quezon City Jail sa Payatas bangud sang plunder case nga ginahawiran sang Fifth Division.
Nagapadayon man ang 90-day preventive suspension ni Estrada nga ginpatuman sang Senado sugod Hunyo 22.
Suno sa liderato sang Senado, bangud sa iya suspensiyon, indi siya makapungko bilang senator-judge sa nagapadayon nga impeachment trial ni VP Sara Duterte.
