Nagpabutyag sang pagduda ang grupong Sambayanan sa kapasidad ni Senate President Sherwin Gatchalian sa pagpanguna sang impeachment trial ni Vice President Sara Duterte, bangud sa ila pagpati nga nagakinahanglan ini sang mataas nga legal nga eksperyensya.
Sa interview sang Bombo Radyo Koronadal, ginpahayag ni Sambayanan General Secretary Jeffrey “Ka Eric” Celiz nga ang impeachment isa ka kombinasyon sang judicial, legal kag political process, gani dako ang papel sang presiding officer sa pagdumala sang trial, ilabi na sa pagresolbar sang mga objection, legal motions kag mga isyu sa rules of procedure.
Suno kay Celiz, bangud indi malikawan nga mangin komplikado ang impeachment proceedings, mas makahatag sang episyente nga pagdumala kun ang nagapreside may malapad nga ihibalo sa layi kag legal nga proseso.
Samtang, ginpahayag man niya nga ginapaabot sang ila grupo nga mahimo gamiton sang prosecution panel ang nagkalain-lain nga alegasyon batok kay Vice President Duterte sa tion sang impeachment trial.
Apang, nagapati ang Sambayanan nga ang pila sa mga tikang nga ginhimo sang prosecution panel ang nagapakita sa isa ka “fishing expedition,” nga ila ginakabig nga wala sang nagakaigo nga legal nga basehan.
Sa pihak sang nagalain-lain nga opinyon sa impeachment proceedings, nagpanawagan si Celiz sa publiko nga magpabilin nga mabinantayon, usisahon ang mga nagakalatabo, kag magpangamuyo nga mangin malinong kag patas ang pagpatigayon sang proseso para sa kaayuhan sang pungsod.
