Nagpati ang isa ka pumuluyo sa syudad sang Koronadal nga wala snag sala si Vice President Sara Duterte.
Sa interview sang Bombo Radyo Koronadal kay Manong Totong, isa ka residente sang syudad sang Koronadal, ginpabutyag niya ang personal nga panimuot kun sa diin ginpahayag niya nga wala sang mabug-at nga basehan ang mga alegasyon nga ginahaboy batok sa Bise Presidente.
Suno sa iya, indi siya pabor sa impeachment case kag nagapati ini nga ang Bise Presidente wala sang sala sa mga akusasyon nga ginpasang-at batok sa iya.
Ginpabutyag man niya ang padayon nga suporta niya kag sang iban pa nga taga-Mindanao sa pamilya Duterte.
Ginpahayag ni Manong Totong nga importante para sa iya nga hatagan gihapon sang hustisya kag patas nga pagtan-aw ang Bise Presidente, kag dapat maghalong ang publiko sa paghusga samtang wala pa sang pinal nga desisyon halin sa korte ukon Senado.
