Ginakabig nga “catch basin” ukon salo-salo sang tubig-ulan ang Barangay Morales sa Syudad sang Koronadal, bangud diri nagadiretso ang halos tanan nga tubig halin sa sentro sang syudad, suno sa kapitan sang barangay.
Sa interview sang Bombo Radyo Koronadal, ginpahayag ni Barangay Captain Dimson Floro nga nagresulta ini sa mas mabaskog nga pagbaha sa pila ka bahin sang barangay, ilabi na sang mabaskog nga pag-ulan sang Oktubre 29 kag 30, 2026.
Suno kay Floro, tuman nga naapektuhan ang mga residente sa Purok Boundary, Purok Tolentino, Purok Alegria kag Purok Masagana B, bangud sa kadamuon sang tubig nga nagasulod sa ila lugar halin sa sentro sang Koronadal.
Dugang pa sang kapitan, bisan ang iya mismo nga puluy-an nga nahamtang sa Purok Alegria wala nakalikaw sa grabe nga pagbaha kag mga damyos nga dala sang mabaskog nga ulan.
Bangud sini, nagpatigayon sang pag-evacuate ang barangay kag may yara sang 11 ka pamilya nga gindul-ong sa Barangay Morales Gymnasium, nga gin-gamit bilang temporaryo nga evacuation center.
Ginpahayag man ni Floro nga nahatagan sang nagakaigo nga bulig ang mga pamilya nga apektado sang pagbaha.
