Ilulunsad sang lokal nga panguluhan sang Kalayaan Palawan ang ginatawag nga “patriotic tours” sa Pag-asa Island sini nga Abril.
Katuyoan sini nga palig-unon ang nasyonalismo kag suportahan ang soberanya sang Pilipinas sa West Philippine Sea.
Kabahin sang tour ang immersion sa komunidad, pagbisita sa mga sundalo, kag pagpartisipar sa mga makabayan nga aktibidad. Lakip man diri ang pagkanta sang “Lupang Hinirang” samtang nagaatubang sa kadagatan kun sa diin may mga barko sang China, pagwagayway sang bandera sang Pilipinas, pagbisita sa mga tropang Pilipino, kag pag-upod sa pang-adlaw-adlaw nga kabuhi sang lokal nga komunidad.
Sa karon, ginapatuman ini para sa mga residente sang Palawan, apang ginaplano nga palapdan ini para sa iban pa nga mga Pilipino.
Magahatag naman ang lokal nga panguluhan sang libre nga transportasyon paagi sa wooden hull boat para sa mga Palaweño, samtang ang mga turista magabayad lamang sang ila pagkaon kag accommodation.
Para makapagpareserba ukon makaupod sa tour, ginahangyo ang mga interesado nga makig-angot sa Kalayaan Municipal Tourism Office.
Ang sini nga inisyatibo nagatinguha ipakita nga ang Pag-asa Island isa ka buhi nga komunidad kag kabahin sang soberanong teritoryo sang Pilipinas.
