KORONADAL CITY – Nakapreparar na ang mga kaso nga igasang-at batok sa apat ka mga drag racers sa Brgy. Carpenter Hill nga nagresulta sa kamatayon sang isa ka persona.
Ini ang ginpahayag ni Koronadal PNP Traffic Unit head PCMSgt James sa interbyu sang Bombo Radyo Koronadal, kun sa diin kaso nga reckless imprudence resulting to homicide and damage to property ang igasang-at batok sa mga drag racers nga nagresulta sa pagkapatay sang biktima nga si Danilo Musico, 55 anyos.
Kun madumdoman nga paliko na sa Prk. Pag-asa si Musico, nga isa ka pintor sa isa ka pribado nga sementeryo apang hinali ini nga nabunggoan sang Raider motorcycle nga ginamaneho naman ni Johnrey Olanday, 20 anyos, kag residente sang Prk. Maunlad, Brgy. Saravia.
Nagkarambola naman ang iban nga mga karerista sang nabunggoan ni Olanday ang motor ni Musico.
Naghana pa nga magpalagyo ang mga ini makaligad ang insidente.
Gindangat pa ini sa balay bulolngan apang naglala ang iya kahimtangan kag tigayon nga ginbawian sang kabuhi.
