Tumutol si Risa Hontiveros sa interpretasyon ni Robin Padilla hinggil sa paggamit ng “force majeure” bilang basehan upang payagan ang remote participation ng mga senador sa plenary sessions ng Senado.
Uminit ang usapin matapos mag-walk out ang minority bloc noong Mayo 26 dahil sa umano’y minamadaling pag-amyenda sa Senate rules na magbibigay-daan sa online attendance o remote participation ng mga senador habang may sesyon.
Sa kanyang paliwanag, iginiit ni Padilla na maaaring maituring na force majeure ang mga umiiral na pandaigdigang krisis tulad ng tensyon sa Gitnang Silangan, banta ng terorismo, posibleng pagkakasangkot ng Pilipinas sa China-Taiwan conflict, pati na rin ang inaasahang matinding epekto ng El Niño sa mga susunod na taon.
Ayon sa senador, kabilang sa force majeure ang mga sitwasyong hindi kontrolado ng tao gaya ng digmaan, kalamidad, terorismo, at iba pang emergency situations.
Ngunit para kay Hontiveros, hindi sapat na batayan ang mga binanggit ni Padilla upang pairalin ang online participation sa Senado.
Aniya, matagal nang umiiral ang mga geopolitical tensions at climate-related concerns ngunit hindi naman ito naging dahilan noon upang magsagawa ng remote work ang Senado.
Dagdag pa niya, bahagi ng tungkulin ng mga senador ang personal na pagharap at pagtalakay sa mga ganitong sensitibong usapin.
Ipinaalala rin ni Hontiveros na malinaw umano sa umiiral na Senate Rules na pinapayagan lamang ang videoconferencing sa panahon ng force majeure o national emergency, tulad ng naranasan noong kasagsagan ng COVID-19 pandemic.
Samantala, wala pang opisyal na tugon si Padilla sa naging reaksiyon ni Hontiveros kaugnay sa isyu.
