KORONADAL CITY – Nagapadayon naman ang monitoring sang pamunuan sang Koronadal City Veterarian sa mga naga sulod nga mga pork meats kag pork products sa syudad agud nga malikawan ang liwat nga paglapta sang balatian sa syudad.
Ini ang nangin pahayag ni Dr. Charlemagne Calo, Koronadal City Veterenarian sa interview sang Bombo Radyo Koronadal.
Madumduman nga kasamtangan nga yara na sa yellow status ang siyudad sang Koronadal kun African Swine Fever (ASF) ang istoryahan base man sa National ASF Prevention and Control Program sang Bureau of Animal Industry.
Ang natabo nga upgrade amo nga gikan sa “Pink” padulong sa “Yellow” zone matapos nasunod sang Koronadal ang mga guidelines sang ahensya.
Madumduman nga maid-id nga ginamonitor sang siyudad ang estado ang African Swine Fever (ASF) kag nagpatigayon ini sang Sentineling Program sa diin 81 ka mga baboy ang napanagtag sang naglabay nga tuig sang bulan sang Nobyembre sa pagpanguna sang Department of Agriculture (DA) Regional Field Office XII sa 51 na mga benepisyaryo.
Madumduman nga may mga hog raisers nga nakabaton sang mga baboy nagikan sa bahin sang Barangay Namnama, Rotonda kag San Jose nga nangin apektado sang ASF sa Koronadal.
