Gindayaw ni Retired Judge Lorenzo Balo ang tikang sang Impeachment Court nga pag-imbitar sa tatlo ka amici curiae ukon “friends of the court” agud maghatag sang legal nga opinyon parte sa voting threshold sa pag-convict kay Vice President Sara Duterte.
Sa interview sang Bombo Radyo Koronadal kay Balo, iya ginpahayag nga makabulig ang mga panan-aw nanday anay Supreme Court Chief Justice Artemio Panganiban, anay Chief Justice Reynato Puno, kag anay Supreme Court Associate Justice Adolfo Azcuna sa paghatag sang mas klaro nga legal nga paghangop sa mga senator-judges kag sa publiko.
Suno kay Balo, importante ini bangud ginatalakay sang Impeachment Court ang kinahanglanon nga duha-katlo ukon 2/3 nga boto sang mga senator-judges para ma-convict ang ginakaso sa impeachment trial.
Sa 24 ka miyembro sang Senado, ang 2/3 votes nagakahulugan sang 16 ka boto.
Apang yara sa sentro sang diskusyon ang interpretasyon kon paano i-calculate ukon pagakalkulahon ang kinahanglanon nga boto kun may mga senador nga indi makapartisipar sa proceedings bangud sa detention, suspension, ukon iban pa nga legal nga rason.
Gani, para kay Balo, makabulig ang legal nga opinyon sang mga amici curiae agud mahatagan sang husto nga basehan ang mga senator-judges sa pagdesisyon kon magapabilin sa 16 ang voting threshold ukon kinahanglan ini nga magbag-o depende sa aktuwal nga bilang sang mga senator-judges nga kwalipikado kag makaboto.
