Padayon ang assessment sang Bureau of Fire Protection (BFP) angot sa posibilidad nga paglupok sang butane ang gintunaan sang sunog sa Purok Mapayapa, Barangay GPS, Koronadal City.
Sa interview sang Bombo Radyo Koronadal kay Kagawad Roberto Agullana sang Brgy. GPS, Koronadal City, iya ginpahayag nga nag-umpisa ang sunog pasado alas-11 sang aga kag gilayon man nga na-fire out.
Sandig sa inisyal nga impormasyon, nagabaligya sang refilled butane ang pamilya Enojas, gani ginakonsiderar ini nga isa sa mga posible nga gintunaan sang insidente.
Apang, wala pa ini makumpirmar samtang nagapadayon ang imbestigasyon.
Totally damaged ang balay nga ginapanag-iyahan ni Bobby C. Enojas, lakip ang isa ka Bajaj kag mga kagamitan sa sulod.
Dugang pa sini, duha ka kalapit nga balay ang naapektuhan sang insidente, apisar wala nasunog ang ila panimalay, nautod man ang ila koneksyon sa kuryente bangud sa insidente.
Gilayon man nga gresponde ang BFP kag iban pa nga emergency personnel, samtang ginbuligan man sang mga lokal nga awtoridad ang naapektuhan nga pamilya.
