Inaasahan ni Juanito Victor Remulla na ang pagkakaaresto kay dating Ako Bicol Representative na si Elizaldy Co ay magsisilbing susi upang mabunyag pa ang mas malalim na bahagi ng umano’y anomalya sa mga flood control projects.
Ayon sa kalihim ng Department of the Interior and Local Government, bahagi pa lamang ang pagkakahuli sa dating kongresista ng mas malawak na imbestigasyon kaugnay ng mga iregularidad sa ilalim ng flood control scheme. Naniniwala siya na dito magsisimulang mabuo ang kabuuang larawan ng isyu at matutukoy ang iba pang personalidad na posibleng sangkot.
Dagdag pa ni Remulla, inaasahang lalabas ang mahahalagang detalye na magdudugtong-dugtong sa mga ebidensya, na maaaring maglantad sa mga nasa likod ng sinasabing katiwalian.
Nagbigay rin siya ng babala sa iba pang indibidwal na posibleng sangkot sa anomalya: hindi umano sapat ang yaman o impluwensiya upang makaiwas sa pananagutan, lalo na kung determinado ang mga awtoridad na habulin at papanagutin ang mga responsable.
