Nanindugan ang COA auditor nga si Xylene Del Campo nga may iregularidad sa pagusar sang P375 milyon nga confidential funds sang Office of the Vice President ukon OVP sang 2023.
Sa impeachment trial ni Vice President Sara Duterte, ginpahayag ni Del Campo nga kulang ang dokumento sang OVP para mapamatud-an ang pila ka paggasto, lakip ang reward payments, surveillance expenses, supplies, medical kag food aid.
Suno sa auditor, wala sang igo nga dokumento nga nagapakita sang resulta sang information gathering ukon surveillance nga ginbasehan sang reward payments.
Ginpahayag man niya nga indi mahimo gamiton ang confidential funds para sa reimbursement bangud ini supak sa Joint Circular No. 2015-01, nga nagatukod sang rules sa paggamit sang confidential kag intelligence funds.
Suno pa kay Del Campo, indi man sakop sang mandato sang OVP kag DepEd ang pagpatigayon sang confidential operations.
Samtang, wala siya makahatag sang sigurado nga sabat kon matuod ukon peke ang pila ka ngalan sang recipients sang confidential funds nga ginquestion sang depensa.
Nagpaandam naman si Presiding Officer Francis “Chiz” Escudero batok sa paglapas sa sub judice rule kag ginpahanumdom ang mga abogado nga maglikaw sa pagpalala sang tensyon sa trial.
