Preparado na ang Filipino boxing champion nga si Pedro Taduran sa pag-atubang sa iya kakompetinsya nga si Brandon Moreno sang Spain para sa iya ikaapat nga depensa sang IBF minimumweight world title.
Pagahimuon ang ila sambuwa sa Kiva Stadium sa Albuquerque, New Mexico, sa Domingo.
Sa opisyal nga pagtimbang, nagrehistro si Taduran sang 104 pounds, samtang eksakto naman sa 105-pound minimum limit si Moreno.
Isa sa mga nangin kabudlayan sa preparasyon ni Taduran amo ang indi pag-upod sang iya regular nga trainer nga si Carl Peñalosa bangud sa problema sa visa. Gani, si beterano nga coach Joven Jimenez ang nanguna sa iya paghanas bilang kapuli.
Si Jimenez amo man ang nagbulig sa paghanas kay anay IBF super-flyweight champion Jerwin Ancajas.
Ini ang ikaapat nga tion nga depensahan ni Taduran ang iya kampeonato nga iya naangkon matapos mapierde si Ginjiro Shigeoka sang Japan sang 2024.
Sa iya rekord, may 20 ka kadalag-an si Taduran, apat ka kapierdehan kag 14 sini ang pinaagi sa knockout.
Samtang si Moreno may limpyo nga rekord nga 16 ka kadalag-an, wala pa sang kapierdehan kag lima ka knockout.
Ginalantaw nga importante ang sini nga engkwentro para mapadayon ni Taduran ang iya paghari sa minimumweight division kag mapakita ang kusog sang mga Pilipino sa internasyonal nga boxing.
