Padayon nga ginamonitor sang City Disaster Risk Reduction and Management Office (CDRRMO) ang mga lugar nga delikado sa pagbaha kag landslide sa syudad sang Koronadal kasunod sang pagbunok sang ulan sang Miyerkules sang aga, Nobyembre 4, 2026.
Suno kay City Disaster Risk Reduction and Management Officer Cyrus Urbano sa interview sang Bombo Radyo Koronadal, lakip sa ila ginabantayan ang mga barangay Saravia, Assumption kag Mambucal, partikular ang mga mabukid nga bahin sang syudad.
Ginamonitor man sang ila talatapan ang mga mayor nga waterway, creek kag Marbel River agud mamatikdan gilayon ang posible nga pagsaka sang tubig kag makapaandam sa mga residente nga yara sa peligro nga mga lugar.
Samtang, ginkumpirmar ni Urbano nga wala sang ginpatuman nga class suspension sa syudad bisan pa sang pag-ulan nga nagsugod pasado alas 6:30 sang aga.
Ginpahayag man niya nga nakabalik na sa ila mga puluy-an ang mga residente nga nagbakwit sa Barangay Morales matapos magsubside ang baha sa ila lugar.
Sa pihak sini, ginpanawagan ni Urbano ang publiko nga magpabilin nga alerto kag magmonitor sang mga pahibalo sang lokal nga gobyerno, ilabi na ang mga nagaestar malapit sa mga suba, sapa kag mga lugar nga daling bahaan ukon maluntaran sang landslide.
