KORONADAL CITY – Indi kumbinsido ang pamilya sang isa ka Overseas Filipino Worker sa Saudi Arabi nga aksidente ang pagkamatay sini matapos nga masunog ang puluy-an sang iya nga employer.
Ginkilala ang napatay nga si Rodelyn Villanueva, 26 anyos, taga Midsayap, North Cotabato kag masobra duha ka tuig na nga nagatrabaho bilang Domestic Helper sa iya mga employer.
Sa interview sang Bombo Radyo Koronadal kay Director Marilou Sumalinog sang Overseas Workers Welfare Office 12, sa ginpaguwa suno pa nga report sang agency ni Rodelyn, aksidente ang natabo nga pagkasunog kag pagkapatay sang biktima.
Sa pagkamatuod, kaupod daw sini nga nasunog ang 14- years old nga PWD nga ginaatipan sini kun diin kritikal man ang sitwasyon sa subong.
Naguwa man ang report nga kalakip sa nasunog ang mga gamit sini magluwas sa isa pa ka cellphone sini nga nadula.
Ginkadtuan suno pa sang utod ni Rodelyn ang nasunog nga puluy-an sang employer sini apang wala niya nakita ang bangkay sini.
Sa subong, nagatalangison ang pamilya sang OFW kag nagalaum nga buhi pa ini bangud nakita pa nga “online” ang messenger sini pila ka adlaw matapos naguwa ang balita nga napatay na ini.
Nahibaluan nga sang bulan sang Nobyembre 2021 nagbiya padulong sa Saudi Arabia si Rodelyn.
Nagpromisa man si Sumalinog nga ginaasikaso na nila kag ginahimuan sang paagi nga makapauli ang bangkay sang OFW.
Makabaton man sang bulig ang pamilya sini gikan sa OWWA.
Kaangot sini, may pahanumdom man si Sumalinog sa mga OFWs nga sa tion nga may problema gilayon nga ipahibalo sa mga ahensiya sang gobyerno.
