KORONADAL CITY – Tuman ang kalipay sang isa ka iloy sang madinalag-on sini nga ginbun-ag ang iya bata nga babaye sa tunga sang covid-19 pandemic.
Ginsaysay sa Bombo Radyo Koronadal ni alyas Len sang Brgy. Lamba sa banwa sang Banga, South Cotabato ang ila pag-uli halin sa Kuwait tubtob sa naglupad sila sa Manila.
Suno kay Len, masobra duha man siya ka bulan nga nagpaidalom sa quarantine sa isa ka hotel sa Batangas antes nga nabatyagan sini nga manugbata na ini.
Ginsabat naman sang OWWA ang pagpadulong sini sa ospital tubtob sa pagbayad sa hospital bills sini.
Nagpabilin naman ini sa ospital sa sulod sang 10 ka adlaw makaligad ginbun-ag si Amirrah Mae Saveigh antes liwat nga nagbiyahe pakadto sa probinsya sang South Cotabato.
Sa subong nagapaidalom na ini sa quarantine facility sa Banga National High School.
Nahibaloan nga Egyptian ang iya bana kag kasamtangan nga yara sa Kuwait.
Kalakip si alyas Len sa 102 ka mga OFWs nga nakapauli sa Pilipinas.
