KORONADAL CITY – Nagapadayon sa karon ang imbestigasyon sang mga otoridad sa nagluntad nga pagpatay sang mister sa kaugalingon nga misis sini nga naghikog-patay man pagkatapos sa sulod sang ila nga puluy-an sa Sitio Bentong, Barangay Lamlahak, Lake Sebu, South Cotabato.
Ginkilala ni Barangay Kapitan Avelino Nalon ang biktima nga si Marites Kali Tambukong, 36 anyos samtang ang suspek nga mister sini amo si Joel Sangga Tambukong, 34 anyos, isa ka mangunguma nga residente sang nasambit nga lugar.
Suno kay Kapitan Nalon, ginhimo sang suspek ang krimen sa atubangan sang mga bata sini.
Naguwa man sa imbestigasyon sang Lake Sebu MPS nga nagahigda na ang biktima sa kwarto tupad ang iya bata sang hinali nga nag-abot ang suspek nga may dala nga binangon kag gilayon nga ginbuno ang kaugalingon nga misis sini.
Nag-angkon sang pilas sa nagkalain-lain nga bahin sang iya lawas ang biktima nga gintunaan sang iya kamatayon.
Matapos makita nga patay na ang misis sini gilayon man nga ginbuno sang suspek ang kaugalingon tubtob nga ginbawian man sang kabuhi.
Gilayon naman nga naghingyo sang bulig sang bata sang mag-asawa sa ila nga mga kaingod apang wala na nahingagaw pa ang mga ini.
Narekober naman sa crime scene ang binangon nga gingamit sang suspek.
Sa subong selos kag wala paghangpanay sang mag-asawa ang ginalantaw nga anggulo kun ngaa ginhimo sang suspek ang krimen.
