Ginkabig nga “bad timing” ang pagsaylo sang liderato sa Senate of the Philippines, bangud mahimo ini magdala sang pagduda sang publiko sa integridad sang institusyon.
Ini ang nangin pahayag ni Former Mayor Atty. Antonio Bendita sang South Cotabato sa interview sang Bombo Radyo Koronadal.
Suno kay Atty. Bendita, ang mga pag-ilis sang liderato sa Senado sa panahon sang politika mahimo makaapekto sa perception sang publiko kag maghatag sang impresyon nga may nagakaigo nga impluwensya sa mga proseso sang impeachment trial ni VP Sara Duterte.
Ginpunto niya nga kinahanglan magpabilin ang Senado nga independiyente kag focused sa ila mandato, agud malikawan ang bisan ano nga pagduda nga ang mga desisyon ukon proseso ginabaton base sa pulitika sa baylo nga sa husto nga pamaagi kag interes sang publiko.
Bangud sini, nagpaanwagan man si Atty. Bendita sa publiko nga magpabilin sa husto kag patas nga pagtan-aw sa mga proseso sa Senado.
