Nagpatuman sang bug-os nga lockdown ang Israel sa West Bank kag nagsugod sa pagguba sang mga bilding sang mga Palestino sa Hebron matapos ang madugo nga insidente sang pagpangluthang nga nagresulta sa kamatayon sang duha ka Israeli nga soldado.
Suno sa mga report, natabo ang pagpangluthang sa checkpoint sa guwa sang Hebron, diin napilasan man ang pila ka suldado sang Israel.
Kaangot sini, ginatudlo nga responsable sa insidente ang duha ka Palestino nga ginreport nga napatay sa pagpangluthang.
Kasunod sini, ginpahayag ni Israeli Prime Minister Benjamin Netanyahu nga laglagon sang Israel ang distrito nga ginhalinan sang mga suspek.
Nagpaandam man ini sang mas malapad nga operasyon militar sa okupado nga West Bank kag ginpakanselar ang iya mga aktibidad sa Hebron.
Samtang, nagdamo man ang kabalaka sa nagapadayon nga kinagamo sa rehiyon matapos ang asod-asod nga pag-atake sang mga ekstremistang Jewish settler sa mga Palestino, lakip na ang isa ka pagtapok para sa tinuig nga pag-ani sang olive nga nagresulta sa pagkapilas sang pila ka tawo.
Suno sa United Nations, sobra 96 na ka Palestino ang napatay sa West Bank sa sulod sang sini nga tuig bangud sa mga pag-atake sang Israel, samtang apat naman ka Israeli ang napatay sa mga pag-atake sang mga Palestino.
Nagapadayon ang tensiyon sa rehiyon samtang ginapangatubang sang mga sibilyan ang peligro nga dala sang nagadamo nga operasyon militar kag pag-atake sa ila mga komunidad.
