Ginpahayag ni Kapitan Paquito Lucero sang Barangay Mabini, Syudad sang Koronadal, nga wala sang pormal nga koordinasyon ukon impormasyon nga nag-labot sa barangay may kaangtanan sa kontrobersyal nga pag-tanom sang mais sa ginapahayag nga duha ka ektarya sang duta nga plano himuon nga public cemetery sang syudad.
Sa interview sang Bombo Radyo Koronadal, gin-athag ni Lucero nga dugay na ang isyu sa amo nga duta kag ginahambal nga halin pa sa tiyempo sang mga katigulangan ukon “panahon pa sang lolo” ang pag-angkon kag paggamit sini.
Suno kay Lucero, apesar pa may yara sang plano nga himuon nga pampubliko nga sementeryo ang lugar, wala sang pormal nga pagpalab-ot sang impormasyon halin sa executive office ukon iban nga opisina sang gobyerno pakadto sa barangay may kaangtanan sa sitwasyon ukon nagaluntad nga isyu sa area.
Dugang pa ni Lucero, wala man sang may nagreklamo ukon nagpalapit sa iya nga mga residente may kaangtanan sa gin-utod nga tanom nga mais, gani limitado lamang ang impormasyon nga yara sa barangay parte sa insidente. Gin-ako man sang barangay kapitan nga aware siya sa plano nga sementeryo ang nasambit nga lugar, apang wala siya sang kahibalo nga may natabo na gali nga pag-tanom sang mais tubtob nga nagguwa ini sa balita.
Sa katapusan, nagpahanumdom si Lucero sa iya mga constituents nga magpadayon sa pagbinuligay kag magkoordinar sa barangay agud malikawan ang indi pagsinabtanay kag mapabilin ang malinong nga kahimtangan sa komunidad.
