Nagpanawagan ang bata sang isa ka balut vendor sa lokal nga gobyerno sang Koronadal nga buligan ang iya iloy nga makabaligya liwat matapos nga ginbalhin ang iya pwesto kag wala na sang makita nga bakante nga lugar para sa iya baligyaan.
Sa interview sang Bombo Radyo Koronadal kay Marianne Tanoy, anak sang balut vendor, ginpahayag niya nga temprano pa sila sang iya amay nga nagkadto sa Gensan Drive agud mangita sang pwesto nga mahimo balhinan sang iya iloy, apang wala sila sing nakita nga bakante nga lugar.
Suno kay Tanoy, nagtinguha man sila nga magpangayo sang permit sa talatapan sang alkalde sang Koronadal agud makapamaligya ang iya iloy, apang wala ini ginhatagan sang pagtugot.
Dugang pa niya, luyag kuntani sang iya iloy nga magbalik sa Lapco, kun sa diin ini anay nagabaligya sang balut kag pastil, apang wala man ini gintugutan nga makabaligya liwat didto.
Ginpaathag ni Tanoy nga indi man madamo ukon dako ang baligya sang iya iloy, kag ang dyutay nga kinitaan sini ginagamit para sa pagbakal sang iya mga bulong nga maintenance.
Gani, nagapangabay ang ila pamilya sa lokal nga gobyerno nga hatagan ang iya iloy sang kahigayunan nga makabaligya liwat ukon magtalana sang klaro kag nagakaigo nga pwesto para sa iya.
Suno sa pamilya, dako ini nga bulig agud makasuporta sa pang-adlaw-adlaw nga kinahanglanon kag sa pagbakal sang maintenance nga bulong sang iya iloy.
