Ginpasangkad sang National Capital Region Police Office (NCRPO) ang ila operasyon kontra sa mga ilegal nga koneksyon sang tubig samtang nagadugang ang panginahanglan sini bangod sa epekto sang El Niño phenomenon.
Ini kasunod sang mando ni NCRPO chief Police Brigadier General Christopher Abrahano sa lima ka police district sa Metro Manila nga palig-onon ang pagpatuman sang layi batok sa mga tawo kag grupo nga nagapahimulos sa mataas nga konsumo kag demand sa suplay sang tubig.
Kabahin sa ginatutukan sang kapulisan ang mga iligal nga pamaagi sang pagkonekta sa linya sang tubig kag ang mga konsumidor nga nagatinguha nga makakuha sang suplay nga wala nagabayad sang nagakaigo nga bayad.
Ginpahugtan man ni Abrahano ang koordinasyon sang kapulisan sa mga water concessionaire, lokal nga panguluhan kag mga opisyal sang barangay agud mahibaluan ang mga lugar nga mas delikado sa amo nga mga ilegal nga aktibidad.
Ginpahanugutan man ang pagpatigayon sang mga mekanismo para sa pagbaton sang reklamo kag report halin sa publiko, gilayon nga pagresponde sa mga sumbong kag joint inspection kon kinahanglanon.
Dugang pa, ginmandoan ang mga police unit nga usisaon kag pasakaan sang kaso ang mga nagapundo ukon nagasuporta sa ilegal nga operasyon, ilabi na ang mga nagakolekta sang bayad kag nagabulig sa pagpatuman sang mga wala ginatugutan nga koneksyon sang tubig.
Pinaagi sini, ginatinguhaan sang NCRPO nga mapunggan ang pagpahimulos sa suplay sang tubig kag masiguro ang patas kag legal nga pag-apod-apod sini sa tunga sang nagataas nga panginahanglan sang publiko.
